Roothi Mehbooba Ko Manaane Ke 11 Lajawab Tarike

Zindagi mein chahe kitni bhi pareshaniyan hon yadi jeevan mein koi prem karne waala ho to saari mushkilein khatam ho jaati hain bhakton. Kintu kabhi-kabhi prem jeevan mein kuch aise bhi pal aa jaate hain ki mehbooba zara si baat par muh phulakar baith jaati hai, aur rooth jaati hai. Vaise to mehbooba ko manane mein bada hi maza aata hai, kintu hamari kuch mahila bhakt badi ziddi hain, wo itni aasani se purushon ko maaf nahi karti. Ab purush bechare karein bhi to kya, isiliye hum apne purush bhakton ke liye laaye hain kuch aise tareeke ki ab aapki mehbooba to kya uski amma bhi turant maan jaategi.

1. Sabse pehle to apni mehboob ko ek zordaar prem patra likh bhejo, kam se kam 420 pano ka prem patra hona chahiye, Aur likhavat aisi honi chahiye ki wo kya tum bhi na samajh sako. Phir dekho, kaise maari firti hai use samajhne ke liye tumhare peeche.

2. Apni mehbooba ke naam se ek prem shanti ka hawn karva lo. Aur uski khabar kisi tarah us tak bhi pahucha do. Wo bin paani ki machhli ki tarah tadapti hui tumse lipat na jaaye to hamara naam Dhongi nahi.

3. Apni mehbooba ki param mitra arthaat uski best friend ke saath apni dosti badha lo. Aur uske saath khoob hans khelkar baat kiya karo. Tumhari mehboob ko aisi mirch lagegi ki wo apni naarazgi bhoolkar tumhare kadmon mein giregi.

4. Uski param mitra ko ek mehenga sa aur achha sa tohfa uphaar mein de do. Jismein ki hriday arthaat dil bhi bana ho. Jab use pata chalega ki tumne apna dil kisi aur ko diya hai aur wo bhi uski sabse param mitra ko to socho uski haalat kaisi hogi.

5.  Aap chahe apni jagah par kitne hi sahi kyun na hon, lekin apni mehbooba ki har galti ko apni galti samjho. Use ye yakeen dilao ki duniya mein tumse bada joru ka ghulam na aaj tak paida hua hai na kabhi hoga.

6. Apni mehbooba ke doorbhaas yantra mein pyaare-pyaare pyaar bhare sandesh arthaat sms bhejo. Wo chahe kitna bhi gussa dikhaye kintu tum bilkul bhi na rukna, aur apni mohobbat ko kisi jalti hui aag ki tarah use dikha dena.

7. Apne chehre par kisi cartoon ka chitra banva lo aur phir uske saamne jaake zor zor se gaana gaao, “Mujhko pehchanlo Mein Hun Kaun??” yadi use tumhari shakal par hansi aa gayi to samjho tumhara kaam jhat se bana.

8. Uski param mitra ko kisi 5sitara hotel mein koi achhi si daavat de daalo. Jab uski param mitra use ye batayegi ki tumne use ek zabardast daavat dee hai to wo bhi us daavat ko yaad kar karke apna saara gussa bhoolne lagegi. Aur aage tum jaante hi ho kya hoga…

9. Apni mehbooba ki manpasand jagah par use le jaakar uske manpasand khaane peene aur gaane ka prabhand karo. Uske saath wo sab karo aur kaho jo use behad achha lagta ho, apni pasand to bhool hi jaao to behtar hai.

10. Apni mehbooba ke liye kisi aise uphaar ka prabandh karo jo use aaj tak kabhi bhi kisi ne na diya ho, uske baad use kisi khaas jagah bulakar, uski aakhein band karke wo uphaar bhent kar do.

11. Apni mehbooba ki taarif mein koi shayari likh kar use suna daalo. Par ek baat hum saaf kar dena chahte hain bachha, yadi tumhari mehbooba ko shayari pasand aa gayi to samjho kaam ban gaya, aur yadi use shayri na pasand aaayi tab to samjho ab tumhara kuch bhi nahi ho sakta, phir to tum sanam bewafa aur dil jale ke geeton ko sunne ki aadat hi daal lo to behtar hoga.

To bhaktjano ye the 11 chamatkari upaay, inhe apni mehbooba par aajmao aur khushhali ke saath saath prem leela karo. Aur haan koi baat bigad jaaye to sanyam se kaam lena. Jald baazi mein aksar bane bane kaarya bhi bigad jaate hain. Tathastu :-)

No Comments Posted in Dhongibol
Ghar Waalon Ko Prem Vivaah Ke Liye Raazi Karne Ke Upaay

Sabhi bhakton ko hamara ‘Prem Poorvak’ aashirvad. Hamare bataye hue upaayon se hamare kai bhakton ko unka man pasand jeevan saathi to mil gaya kintu ab unhe apne mata pita se vivaah ki anumati nahi mil paa rahi. Kai bhakton ne apne mata pita ki tulna pathhar dil waale insaano se kar dee, par hum is baat se bilkul bhi sehmat nahi hain bhakton, mata pita to ishwar ka roop hote hain, jitna pyaar hamare mata pita hamse karte hain, utna koi bhi nahi kar sakta, atah is tarah apne mata pita se takraav karna theek nahi. Aapki samasya hamari samasya hai, chalo hum aapko dete hain kuch aise totake ki jinko amal mein la daala to samjho maa baap ko shadi ke liye pata daala.

1- Sabse pehli baat, mummy ko hamesha khush rakho. Kyunki jaise aap kisi ko behad prem karte hain vaise hi aapke papa bhi aapki mummy ko bahut prem karte hain, yadi aap kisi tarah se apni mummy ko is mahaan kaarya ke liye apne vash mein kar lein to samajh lo ki aapka aadha kaam to sampann hua. Papa ko manana mummy ki daayin ungli ki baat hai.

2- Mummy ke saamne apni premika ki dheron taarifein kiya karo, kaho ki wo aapke pair dabayegi , aapke liye bhinn-bhinn prakaar ke bhojan banayegi, aur aapki burayi apni saheliyon se kabhi nahi karegi. Hone waali saas aur bahu ne agar ek doosare ko pasand kar liya, to phir agar tum bhi chaho to vivaah se mana nahi kar sakte.

3- Agar aapko kisi ladke se prem hai to apne papa ko uski achhaiyon ke baare mein batao. Batao ki wo aapka kitna khayaal rakhata hai, aur aapse kitna prem karta hai. Har baap yahi chahta hai ki uski beti ka pati use hamesha khush rakhe, isiliye kisi bhi tareeke se kuch aisa khel khelo ki papa ki nazron mein tumhara premi DDLJ ka sahrukh ban jaaye.

4- Aapne sholay to dekhi hi hogi bahakton, usmien jis prakaar se dharmendra ne paani ki tanki par chadkar apni mehbooba ki mausi ko pataya tha, theek usi tarah aap bhi apne premi ke saamne waale ghar, ya kisi lambe se ped mein chadkar dharmendar ki tarah dialog bolo. Tumhare premi/primika ke ghar waalon ne agar sholay dekhi hogi aur agar unke ghar mein koi maushi hogi, to samajh lo safalta nischit hai. (Ped par chadne se pehle dhyaan dein, ped se gire to seedha haddiyon ke doctor ke paas bheje jaaoge, isiliye zara sambhallkar hi chadna)

5- Apne hone waale sasur ke peeche paagal kutte chhod do, aur baad mein rajnikanth ki tarah hawa mein udte hue apne sasur ko bacha lo, par dhyaan rakhna kam se kam 1-2 kute zaroor tumhare sasur ko kaatein, kyunki jab jab wo us ghaav ko dekhenge tab-tab unhe tum yaad aaoge, aur unhe ehsaas hoga ki unki bachhi ke liye tumse behtar ladka teeno lokon mein nahi hai, haan ye baat aur hai ki paap karne mein tumhari tulna kisi se nahi ki jaa sakti.

To ye the bhakton hamare kuch anmol totake, inhe apnao aur apni jeevan ki naiya ko prem ki naiya se paar lagao *-)

No Comments Posted in Dhongibol
Ek Saath Do-Do Logon Se Ishq Ladane Ke Achook Tareeke

Zamana kaafi aage pahuch gaya hai bhakton. Ab ek se kaam nahi hota. Phir wo chahe mobile phone ho, Computer ho ya pyaar. Kam se kam 2-4 logon se pyaar karna aajkal ka rivaaj ban gaya hai. Kyunki agar ek ne dhoka diya to doosara koi to hona chahiye na. Par kuch bhakt 2-4 logon se ek hi samay mein ishq ladate samay pakde jaate hain, aur joote chappal khaakar waapas aate hain, apne bhakton ki isi samasya ko door karne ke liye aaj hum aapko denge kuch aise anmol tareeke jinko amal mein laane ke baad aap 2-4 kya, balki 15-20 logon se ek hi samay mein ishq lada sakte ho, aur pakde bhi nahi jaaoge.

1- Ek zamana tha ki log kasmein khaate the jiyenge saath aur marenge saath. Kintu aaj ke samay mein log pehli kasam khate hain ki na tu mera mobile check karegi, aur na mein tera check karunga. To kehne ka arth hai bhakton ki jab bhi unse milne jaao to bhoolkar bhi apna Chalit Doorbhas yantra arthaat mobile phone na le jaayein. Ye samaj lo ki tumhara sabse bada shatru hai ye.

2- Hamesha koshish karo ki alag-alag jagah ke logon se ishq ladaaya jaaye. Yaad rakho aajkal duniya chhoti hoti ja rahi hai, yadi ek hi sthaan ke logon se ishq ladaya to pakde jaane ki apaar sambhaavna hai.

3- Jitne logon se tumhara chakkar chal raha hai un sabko alag-alag mobile no do. Aur sabko apna naam alag alag batao. Khatra mol lene ki bhool na karna. Aur ye yaad rakhna, saavdhani hati durghatna ghati.

4- Kisi bhi haal mein unke saath chitra arthaat photo na khichvao. Kyunki galti se usne tumhara chitra facebook mein daal diya to tumhara to chamatkaar ho gaya samjho. Phir to hum bhi do chaar laat ghoose maarne mein peechhe nahi hatenge.

5- Jitne logon se pyaar karte ho utne facebook account bana lo. Aur sabko alag alag account mein add karo. Yaad rakho tumne zara see bhi laaparwaahi barti to tumhara bhaanda phoota samjho.

6-  Kabhi bhi apne kisi mitra ko apne prem prasang arthaat affair ke baare mein na batao. Aajkal dushmano se zyaada khatra apno se hota hai, kahin aisa na ho ki tum kisi ko patane mein laakhon paapad belo aur tumhara mitra use lekar udan chhu hole. Mitrata apni jagah aur prem apni jagah. Zyaada jaankaari ke liye angrakchhak artaat Bodyguard dekh lo bachha, samajh aa jaayega ki aajkal ke mitra kis mitti ke bane hain.

7- Jab bhi ishq ladane jaao to hamesha kisi aise sthaan par jaao jahan doosari waali ke hone ki sambhaavna bilkul bhi na ho. Kyunki yadi unmein se kisi ek ne bhi tumhe doosari waali ke saath dekh liya to tumhara to phir jo haal hoga uski hum abhi sirf kalpana hi kar sakte hain.

Ye the hamare kuch aise achook sujhaav jinhe apnane se aap 2-4 kya balki jitne chaho utne logon ke saath raas leela racha sakte hain. To bhakton der na karo aur zyaada se zyaada logon par ye achook tareeke apnao…Dhong kaayam rahe ;*)

No Comments Posted in Dhongibol
Baap Se Paise Mangne Ke Tarike

Aajkal ke aadhunik zamane mein kuch baap apne bhole bhale bachhon ko jeb kharche ke liye dhan nahi dete. Aisi kai shikaytein hame har roz mil rahi hain. Aapki isi chinta ko door karne ke liye hum laaye hain aapke liye kuch aise tareeke ki jinko aajmane ke baad aapka baap to kya, baap ka baap bhi aapko bharpoor dhan denga. To Ye hain hamare anmol tarike.

1- Ye jo papa log hote hain bhakton, bade hi chalaak hote hain, paise na dene ke tarah-tarah bahane banate rehte hain. Isiliye jab bhi aap apne baap se pasie maangne jaayein to dhyaan rakhein ki jo bahanae pita shree ne pichhli baar banaya tha wo is baar na banane paayein.

2- Papa se pasie tabhi maanaga karo jab wo kisi kaam ki jaldi mein hon. Jaldi baazi mein aapka kaam hone ki apaar sambhaavna hai.

3- Jaise hi papa ki tankhwa ki taarikh nazdeek aane waali ho, unki kuch zyaada hi khatirdari karo. Wo ek glas paani maange to tum do glas paani do. Wo nahane ke liye thanda paani paange to tum usmein baraf daalke do. Aur jaise hi papa tankhwa lekar aayein apne pyare papa se jitna ho sake utna maal nikaal lo.

4- Har insaan ko apni taarif sunna pasand hai bachho. Isiliye papa ke doston ke saamne apne papa ki khoob taarif kiya karo. Aur jhoot mooth hi keh diya karo ki hume to papa har roz paise diya karte hain, aur papa ke doston ke saamne hi papa se poorne mahhene ka jeb kharch maang daalo. Phir dekho chamatkar, papa ke doston ke jaane ke baad papa kya kya dete hain.

5- Har insaan ko pyaar zaroor hota hai bhakton. Aur papa log to apne zamane ke hero hote hain. To aaj hi pata karo ki wo kaun thee jisne tumhare papa ko apna deewana bana diya tha. Agar tum ye raaz jaanne mein safal ho gaye to tumhari to nikal padi bachha. Muh maangi keemat samay-samay par papa se vasool kar sakte ho.

6- Agar papa kisi ko buri nazar se dekhte hain to ye tumhare liye bada faaydemand saabit ho sakta hai. Papa ko blackmail karna shuru kar do, ki agar unhone muh maangi keemat nahi chukai to papa ki khair nahi, socho mummy papa ka kya haal karegi agar mummy ko pata chala to.

7- Papa ke batve mein se 1000 rupiya nikal lo (apne papa ke batve se paise nikaalna chori nahi hoti bhakton). Aur baad mein papa ko kaho ki papa aapke 500 rs mujhe gire hue mile the. Papa ko lagega ki mera bachha kitna shareef hai, aur papa ki es bhool ka faayda tumhe 100-200 rs papa ki taraf se uphaar ke roop mein milenge aur 500 rs to pehle se hi tum papa ko thag chuke ho, to hui na ek teer se do shikar walli baat ;-)

No Comments Posted in Dhongibol
Film Bodyguard Ki Kahani Dhongibaba Ki Zubani

Hamare priya bhakt Salman ki aur ek film aayi hai naam hai Angrakshak arthaat Bodyguard. Ab jab naam hi itna achha hai to film bhi achhi hi honi thee. Hamare chelon ko to kai ghanton tak line mein khade rehne ke baad film ka ticket mil paaya. Aur aakhirkaar jab humne film ka ticket paaya to hame zara sukun mila. Aaahaa haaaa…kya film hai bodyguard, Dhishum Dhishum se lekar hasi ke samandar tak, sab kuch hai ismein. Aur phir ek sabse alag tarah ki prem kahani, jise dekhkar koi bhi pathhar dil pighal jaaye. Salmaan bete aur kareena ne jo abhinay dikhaya hai use dekhkar to hamara man bhi aajkal yahi gunguna raha hai ki “Aao ji vao ji Dil se dil milao ji Aa gaya hai dekho Bodygaurd”…

Film ki shuruaat mein Salman bete ne jis andaaz mein chalti hui train mein gote lagaye hain, hamara to man prasann ho gaya. Aisa lag raha tha maano ki hum koi sapna dekh rahe hain. Aur jis anzaaz mein Salman bete ne apne shatruon ka naash kiya hai use dekhkar to hum bhi soch rahe hain ki ab hum bhi kisi ke Angrakshak arthaat Bodyguard ban jaayein.

Humne to cinema haal ke andar hi Salman bete ko aashirwad de diya, aur uska parinaam dekhiye ki Angrakshak arthaat Bodyguard ne videshon mein kaamyabi ke saare record tod daale hain. Hum to apne bhakton se yahi kahenge ki ab zyaada samay na gavayein aur jaise hi fursat mile to Angrakchak arthaat Bodyguard dekhkar aayein aur  sada gungunayein Dhongi baba namo namah….

Kalyaan ho!!

No Comments Posted in Dhongibol
Bhrashtachar Ke Khilaaf Dhongibaba

Sabse pehle to sabhi bhaktjano ko hamara aashirwad…

Bhrashtachar apni saari hadein paar kar chuka hai bhakton. Hamare aashram mein bhi humne 4 dhokebaaz sishyaon ko range haathon dhandhla karte pakda hai. Is amavashya ko un charon dushton ko sareaam faasi par latkakar hum Bhrashtachar ke khilaaf apni jang ka elaan karenge. Desh bhrashtachar ke dal dal mein fas chuka hai. Hume hamare china mobile mein laakhon sms praapt hue hain, jismein bhakton ne kaha hai ki “baba aaj ke zamane mein bina paisa khilaye koi kaam nahi ho raha”. Ab jab aap bhakt musibat mein ho to bhala hum kaise chain se shaant reh sakte hain. Isiliye apne pyaare desh ko aur apne priya bhakton ko bhrshtachar se mukti dilane ke liye humne bhi apne tareeke se in bhrashtachariyon ko saza dene ka nirnay liya hai. Humne ek list banayi hai jismein 3525 bhrasht logon ke naam humne nikale hain. Hum ye maang karenge ki in sabhi 3525 bhrasht logon ko hamare hawaale kiya jaaye taanki hum inhe kholte hue tail mein tal sakein, aur inhe machliyon ko khila sakein.

Is mahan kaam mein hamare saath Dhongi khandaan ke sabhi maha baba, bhakt jan tatha bhoot pishaach, chudail aadi bhi bhaag lengi. Kyunki desh ke andar jo bhoot bhutaniyan hain unka khaatma karne ke liye humne khaas bhooton aur bhutniyon ki ek sena gathit kee hai. Jo in dushto se inhi hi bhaasha mein baat karenge.

Apne aandolan ki shuruaat hum paatal lok ke aashram se karenge. Hamare bhaktjan Paatal ke darwaaje se himalay waale aashram tak haathon mein torch lekar ek haa-haakaar raily nikalenge. Kyunki Kailash parvat waala aashram aajkal marammat ke liye band kiya gaya hai. Uski marammat mein to kai saal lagne ki sambhaavna hai. Hamare aashram ki marammat ke liye 2500 karod ka contract diya gaya hai. Aur iski marammat mein Taj Mahal banane waale kaarigaron ke bachhe lage hain.

Jaise hi hamare aandolan ki khabar in samachar channelon tak pahuchi inka poora ka pora dal hamare aashrm mein aa tapka. Jaise ki Bharat TV, Chandrama TV aur Kal Tak ne dera daal diya hai. Kashmir se kanyakumari tak tatha teeno lokon mein faile hue hamare bhakt jo bhi bhrshtachar se mukti chahte hain hamare aandolan mein jud sakte hain. Aandolan se judi jaankari ke liye hamare paatal lok waale aashram ke darwaaze aapke liye hamesha-hamesha ke liye khule hain. Chaliye hum abhi chalte hain. Bharat TV mein aaj humn aapki pukaar naamak kaaryakram mein sakshaat prakat hone waale hain, aap bhi aaiyega apne dusht saathiyon ko bhi laaiyega aur ye naara zaroor gaiyega Bhrashtachar mitana hai dhongibaba ko agla PM banana hai. Khush Raho. . .

No Comments Posted in Dhongibol
Udhaar Maangne Ke Tarike

1- Kisi se bhi udhaar maangne se 8-10 din pehle usse khoob mel-jol badha lo. Ek baar murgi jaal mein fas jaaye to saare ande tumhare hain.

2- Jisse udhaar maangne ki yojna bana rahe ho use pehle ek chhoti-moti party de do. Aur 2-4 tareefein kar do. Fir dekho tumhara kaam kaise banta hai.

3- Thoda sa emotional atyachar karna behad zaroori hai. Agar emotional atyachar safal raha to fir jitna maangoge utna udhaar milega.

4- Udhaar hamesha 2-4 logon ke saamne hi maanga karo. Aisa karne se udhaar dene wala kabhi bhi udhaar dene se mana nahi kar paayega.

5- Koshish karo ki paisa shanivaar ko maanga jaaye, Kyunki agle din to ravivaar hoga. Fir 2-4 din jaise taise taal hi loge.

6- Apne kisi chacha ya tau ko beemar batakar koi lambi chaudhi rakam ainth lo. Uske dil ko itna pighla do ki wo majboor ho jaye tumhe paisa dene ko. Udhaar hi nahi, tumhe wo bhet mein hi de de paise.

7- Wo jise sabse zyaada pyaar karta hai uske saamne uske pair pakad lo. Aur zor-zor se rona-dhona karke jitna ho sake utna paisa ainth lo. Waapas dene ki koi zaroorat nahi hogi.

8- Ek baat hamesha yaad rakho udhaar maangkar ek-do baar time se pehle hi udhaar chukta kar do. Phir jaise hi udhaar dene waalon ko tum par yakeen ho jaaye to koi bada haath maar lo ;-)

4 Comments Posted in Dhongibol
Amir Ban Ne Ke 16 Tarike

Kya aap amir ban na chahte hain? Ye rahe Dhongibaba ke 16 zordaar upaay. Inhe apnaiye aur paison ke dher mein nahaiye.

1. Apne nazdik ke chaurahe par baithkar hamari bhavishyvani sunao aur karodo kamao, ek-ek se 501 rupiya lena. Dhanda apni jagah, yaari dosti apni jagah. Hamara hissa pura 20% hai, yaad rakhna. Gaddari karne ki bhool na kar baithna kyunki hamare dhongiwindows software mein sab ki khabar hoti hai.

2. Apna naam badal kar Mobilewale baba ya daphliwale baba ya aur koi baba rakh lo. Uske baad kisi bheed-bhaad waali jagah mein ghoomo. Jitne zyaada log tumhe dekhenge utna zyaada chadava tumhe prapt hoga. Chadave ka 10% hamara hoga.

3. Apne Account ke saare paise hamari dhongibaba co-op bank mein account khulva kar transfer kardo. Tumhara dhan ka chaar guna tumhe wapas milega. Is janam mein ya agle janam mein, chaar guna to mil hi jaayega.

4. Har mahine apni aamdani ke 10% hisse se dhongi bumper lottery kharido. Har lottery ke ant ke 3 ank ek samaan hone chahiye. Aur intezaar karo – 5-7 saalon mein tumhari bhi lottery niklegi.

5. Shaam/raat ko kisi bar ke paas khade hokar ande becha karo. Bahut se sharaabi tumhe sharaab ke nashe mein 2 rupaye ke badle 100-200 de jaayenge.

6. Raddi/Kabaad ikattha karke use becho. Duniya ki nazron mein us kabaad se kuch nahi aata. Laabh hi laabh hai bachha kabaad mein. Zara socho khud ko tum kabaad bechte hue kitne pyare dikhoge. Thode dinon mein kabaadi king kehlaoge.

7. Tumhare jitne bhi jaan pehchaan ke log hain sabhi se 1-1 rupiya maang lo. Yaad rakho boond-boond se hi ghada bharta hai. Aur sabse badi baat ki jab tum sabse 1 rupiya maagoge to use waapas koi nai maangega. Isiliye aaj se hi ek rupiya maangna shuru kar do.

8. Unlimited talktime wala phone lekar ek PCO khol lo. Fir kya hai, mahine ke ant mein jab tum iska munaafa dekhoge to ulte pair hamare ashram ki taraf mithai ka dabba lekar aaoge, ye vaada hai hamara.

9. Aajkal ke logon ko kuch kaam dhandha to hai nahi, isiliye to wo bewakoofon ki tarah taveez aur angoothiyon mein paisa kharch kiya karte hain. Jald hi mauke ka faayda uthakar ye dhandha apna lo. Hamari tasveer angoothi, taveez aur pendant mein daalkar bechna chalu karo. 25% hissa hamara hoga bachcha. Hamare ashram mein bhi to kharcha hai.

10. Apne kisi paise wale chacha ya mama ki khoob seva kiya karo. Taaki jab wo parlok sidharen to apni jaaydaad se thoda bahut to tumhe bhi de jaayen. Hindi picture nai dekhte kya tum – yahi to raasta hai.

11. Agar tumhare haathon mein khujli lage to bhoolkar bhi apne haath mat dhona. Yahi to nishani hai ki ab tum paise wale banoge. Par bachcha paisewale ban ne ke baad humein bhoolne ki bhool bhoolkar bhi na kar baithna, anyatha palbhar mein hi kangaal ho jaaoge.

12. Hamare kisi amir bhakt se shadi kar lo. Shadi se pehle to tum kuch kar na sake, lekin humein vishwas hai ki hamare amir bhakt se shaadi karte hi tumhare rahu-ketu sab theek ho jayenge.

13. TV par kisi ka swayamvar aaye to usmein hissa le lo. Ismein to bevakoof hone ka bhi bada fayda hai. Bahut pragati karoge bachha.

14. Lottery bechne ka kaam shuru kar do. Kaafi kamaai ka dhanda hai ye. Hamare kai saare bhakt har mahine karodon ki lottery khareedte hain. Hum unhe bol denge ki abse lottery sirf tumhari hi dukaan se khareeden. Apna pata humein sms kar dena 1-800-dhongibaba par. Hamara hissa hamare bachat khaate (saving a/c) mein dalva dena.

15. Aaj kal ke netaon se zyaada to koi bhi nahi kamata. Dekhte hi dekhte paisa aur taakat dono mutthi mein aa jaati hai. Tum bhi koi neta ke PA ban jaao aur phokat ka paisa khao.

16. Tum ek top level ke khabri ban jao. Har khabar yahan ki wahan karo aur jitna chahe utna kamao. Har khabar ka kam se kam hazaar rupiya lena. Hamari zaroorat pade to bejhijak keh dena. Hamare chele aayenge tumhari sahayta ke liye.

Agar tumne ye sabhi tarike padh liye hain to isse ek baat to siddh hoti hai, ki yadi swayam hum bhi tumhare saath saari zindagi gujaar dein to bhi tum amir nahi ban sakte. Ye sab padhne se achha hai ki kahin apne samay ka sahi upyog karo to 2 paise kamao. Chalo humein bhi paise kamane jaana hai ;-)

5 Comments Posted in Dhongibol
College Mein Admision Lene Ke Tarike

Aajkal college mein admission milna himalaya ki chotiyan chadhne se zyaada mushkil ho gaya hai. Hamare dhong bhare dimaag mein kuch sujhaav aaye jo ab aap ke saamne hain. Padhiye aur padhaiye ye raaste apne doston ko.

1. Sa-parivar college mein jaakar bawaal macha do. Jab tak do chaar news channel waale na aa jaayen bilkul na hilna. Yaad rakho ek baar ye khabar akhbaar athva tv mein aa gayi, to college ka principal khud tumhare darwaje par aayega tumhara admision karne. Keh dena media se ki college ne tumko vaada kiya tha admission ka.

2. College ke principal ke ghar doodh-dahi ityaadi khaane peene ki vastuen lekar pahunch jaao. Aur unke ghar ke kaam-kaaj mein haath batao. Yaad rakho kuch paane ke liye aajkal bahut kuch khona padhta hai.

3. Uppar wale upaay se zyaada achha ye tarika hai. Aapko jis college mein admission chahiye uske principal ke ghar par aap 6 mahine pehle se hi naukar ban jao – naukri kar lo. Din mein 2-3 ghante jhadoo, pocha aur bartan hi to karne padenge. Lekin uska fal tumhe milna hi milna hai.

4. College ke principal aur dusre shikshakon ke bachhon se dosti kar lo. Aur unhein apni dosti mein unhe itna paagal kar do ki wo tumhare bina ek pal bhi na gujaar saken. Baad mein apne admision ka kaam bhi unhi ke sar daal do.

5. Principal ki shrimati se mel jol badha lo. Unka koi bhi bahar ka kaam ho to jaakar karke aao. Yaad rakho har mard ki gardhan uski bivi ke haathon mein hoti hai. Lekin koi anuchit kaarya na kar baithna, jisse humein bhi sharminda hona pade.

6. College mein jaakar ek gang bana lo. Jiska naam Dhongi gang hona chahiye. Aur hamare tarah vastra dhaaran karke bhook hadtaal par baith jaao. Bhook hadtaal sirf naam ki honi chahiye. Chupke se pizza wageraah khate rehna. Jab tak admision na ho jaaye ye nautanki jaari rakhna.

7. Principal ko bata do ki tum kiske shishya ho. Hamara naam sunte hi uski pairon tale zameen khisak jaayegi. Hahakaar mach jaayega samast paathshaala mein. Palak jhapakte hi tumhara daakhila nischit hai.

8. Principal ki pichhli zindagi ki chhan been karo. Pata karo ki unka kisi ke saath prem sambandh tha kya jis ke baare mein kisiko bhanak bhi nai hai. Agar kuch baatein maloom pade to principal se keh dena, admission de do nahi to soch lo.

9. Principal ke pair pakad lo. Jab tak wo daakhila dene ke liye haan na bol de pair bilkul na chhodna. Chahe wo gir bhi jaayen to bhi apne kaam mein date rehna.

10. Kuch mahino pehle se hi sabhi gurujano ke parivaar se mel jol badha lo. Tumhe abhi se maalum hona chahiye ki tumhare ank kitne kam aane waale hain. Jitna zyaada meljol badhega, baad mein tumhe utni hi aasani hogi.

11. Faaltu ke tareekon ko padhne aur apna bahumoolya samay vyarth karne se behtar hai ki aaj se hi kathin parishram karna aarambh kar do. Agar abhi se padhai mein dhyaan doge to kabhi kisi ke aage haath na failaana padega. samjhe bachha ;)

1 Comment Posted in Dhongibol
Ladki Patane Ke Tarike Part-2

Ladkon se ek bhi kaam theek se nahi hota. Pehle hi itne tarike de diye ladkiyon ko patane ke liye lekin yeh ladkon se koi pat ti hi nahi hain. Ladkiyan zyaada achhi hain, unhe humne thode par bade achhe tarike diye – wo unka barabar istemaal kar rahi hain. Ab ladkon ke liye hum thode aur tarike le aaye hain. Iske baad bhi agar aap asafal rahe to fir umeed chhod dijiye.

1. Pata karo ki use kaun sa filmy hero pasand hai. Aur tum bhi usi hero ki tarah dressing karke uske saamne ghoomo. Maamla fit hone mein der nahi lagegi.

2. Ladkiyan khaane-peene ke maamle mein ladkon se kaafi aage hoti hain. Isiliye jab bhi unse milo to bina khilaye-pilaye mat jaane dena. Ye baat aur hai ki wo na na karti hai, lekin unki na ke peeche hi to haan hoti hai.

3. Ladkiyon ko dance karne wale ladke bahut pasand aate hain. Isiliye abhi se dance ki practice shuru kar do. Mauka milte hi koi Govinda ka zordaar geet chalu kardo aur thumke lagao.

4. Uski best friend se dosti kar lo. Use hamesha hasate raho aur pata ke rakho. Ek baar agar uski best friend pat gayi to phir wo apni friend ko tumhari ungliyon par nacha degi.

5. Uski har ek ada ki taarif kiya karo. Uski jitni zyaada taarif karoge utna jaldi hi uske dil tak pahunch sakoge.

6. Uske janamdin par sabse pehle use wish karo. Kuch aisa uphaar use do jo aaj tak use kisi ne na diya ho. Phir dekho kamaal.

7. Ladkiyon ka dil bada komal hota hai. Us komal hriday ko jeetne mein gulaab ka phool sabse achha tarika hai. Jab bhi usse milo to use ek laal gulaab diya karo. Agar usne ek baar bhi gulaab le liya, to tumhari to nikal padi.

8. Use ghuma firakar hi batana ki tum use pasand karte ho. Ghuma firakar baaten karne wale ladkon ko ladkiyaan pasand karti han. Itna mat ghumana firana ki wo tumhe rakhi baandh de.

9. Tum jise chahte ho poori tarah se usi ke jaisa rehne ki koshis karo. Wo jo khati hai wo tum khao. Wo jahan jaati hai wahan tum jao. Aisa karne se wo tum par apni jaan luta degi. Kyunki tum to wo sab kar rahe ho jo use pasand hai.

10. Kabhi bhi apni pareshaniyan use mat batao. Koi bhi ladki aise ladke se pyaar nahi karti jiski zindagi mein dher saari pareshaniyan hoti hain. Isiliye use is tarah se baat karo ki tum is duniya ke sabse khuskismat insaan ho. Bhale tumhara naam kangaalon mein pehla aata ho.

11. Agar ladki tumhari class mein padhti hai, to pata karo ki wo kis vishay mein kamjor hai. Use fir batao ki tum us vishay ke sabse bade gyaani ho. Vishay sikhaate sikhaate use apne dil ka haal bata do. Agar wo tumse zyaada akalmand hai, to tum use madad maango kisi vishay ke liye.

12. Agar ladki tumhare saath padhai karti hai to use koi padhai ki kitaab mang lo. Vapas karte waqt andar ek prem patra daal do. Niche naam mat likhna. Agar chappal padne ki baari aaye to bilkul mukhar jaana. Aur haan bol de to 10 kilo jalebi ka prasad hamare ashram mein bhijwa dena.

13. Jab bhi ladki tumhe koi uphaar de to tum uske uphaar ki khoob taarif karo. Yaad rakho tumhari taarif jalti hui aag mein ghee ka kaam karti hai.

14. Jise tum chahte ho uske liye thoda kharcha karo. Har 2-4 din baad use ek chhota tohfa do. Ab tum kahoge ki kaun itna kharcha karega. Suno to sahi, aaj kal sadak ke kinaare log badhiya chinese maal bechte hain. Dekhne mein hazaar, daam sirf sau. Kharido aur de do.

15. Ab tumhe to sirf ek ladki chahiye apni duniya mein. Jo ladki thodi bhi achhi lage use propose kar do. Haan bolegi ya na. Haan boli to kaam ban gaya aur agar na hua to kya, dusri koi dhund lo. Dus mein ek to haan bol hi degi.

16. Apne mobile ke wallpaper mein hamesha uski hi tasveer rakho. Uska dil pighal jayega aisa dekh ke. Aur uske liye apne phone mein koi meetha sa naam rakho. Fir dekho.

17. Apne kisi dost ko ladki ka bhai banva do. Aur ek din wo bhai apni behen ke liye tumhara haath maang lega. Bhai ko behen kabhi naa bol sakti hai kya. Yaad rahe, pehle ek rakhi to use zaroor bandhwani padegi. Rakhi ki kasam dekar haath mangne se 100% karya safal hoga.

18. Kahin se uske bachpan ki koi tasveer uda lo jise dekhkar wo ascharyachakit ho jaaye. Apna bachpan tumhare haathon mein dekhkar wo apna bhavishya bhi tumhare haathon mein dekhna chahegi.

19. Agar tumhe pata hai ki wo har hafte mein kisi din mandir jaati hai, to tum bhi pahunch jao. Jaise wo pahunche tum mandir ki ghanti bajana chalu kar do. Uske dil ki ghanti baj jayegi bhagwaan ke saamne.

Agar tum safal rahe apne maksad mein to mithaaiyan hamare ashram mein bhej do. Aur agar nahi hue to fir kya… kuch nahi. Dimaag mat khao hamara.

12 Comments Posted in Dhongibol