Dhongibaba ki Bhavishyavani

Bhaktjano aaj hum aapko batayenge ki Jab ek ladka jo ki ek ladki se pyaar karta hai, to use ladki ke baap ke se kis tarah ke sawaal poochhe jaate hain, aur jab wahi ladka arrange marrige ke liye kisi ladki ke baap ke paas jaata hai to kya hota hai.

Dhongibaba

Love Marrige Karte Sanay Ladki Ke Baap Dvaara Poochhe Jaane Waale Sawaal:-

1- Kitna kamate ho.

2- Kya guarenty hai ki meri beti ko hamesha khush rakhoge.

3- Meri beti ko maine bade pyaar se paala hai, tumhari itni si salary mein meri beti khush nahi reh sakti.

4- Daaru ya beedi cigrate to nahi peete.

5- Itne chhote se ghar mein mein apni beti nahi dunga.

6- Sirf pyar ke sahare zindagi nahi chalti.

Ab Dekho Arrange Marrige Mein Baap Ke Sawaal:- (Ladke ki salry pehle wale se bhi kam, ladka ek no ka sharabi.)

1. Beta ghar dhoondne mein koi takleef to nahi hui.

2. Arre beta paisa kam ho ya zyaada kya farak padta hai, pyar hona chahiye bas.

3. Sab theek hoga hum hain na saath mein.

4. Meri beti ne bade achhe karam kiye honge jo aap jaisa daamad mila.

5. Arre aajkal kaun nahi peeta.

6. Beta shadi jitni jaldi ho jaate utna achha hai.

Ishaqzaade Ka Review

Bhaktjano is Ravivar humne IPL se tang aakar Ishaqzaade dekh daali. Aur yakeen maaniye bhakton, poora paisa wasool film hai. Naye kalakaron ne jo abhinay dikhaya hai hum to bas aascharya chakit ho gaye hain, ek baar nahi humne to 3 baar dekh daali. Arjun Kapoor, Parineeti Chopra, aur Gauhar Khan ne jo kalakari dikhayi hai, hum to bas waah waaah waaahhhhhhh hi karte reh gaye. Aur film ka wo geet, mein pareshan pareshan pareshan…humne to is geet ko suna to hum to apni saari pareshani bhool baithe. Is film ki hum jitni taarif karein wo kam hai, bas itna hi kahenge an zyaada waqt na gavayein aur aaj hi ye film “Ishaqzaade” dekhkar aayein.

Kalyaan ho

Saal ke 365 din mein jo hamara sabse zyaada khayaal rakhti hai wo hai maa. Bhagwaan se bhi badhkar jo hai wo hai Maa. Jiske kadmon tale jannat hoti hai wo hai Maa. Subah uthne se lekar raat ko sone tak jo hamare liye sabse zyaada chintit rehti hai wo hai Maa. To bhaktjano is Mother’s day ke din apni Mummy ke liye kuch aisa kijiye ki bas ye din unki zindagi ka sabse yaadgaar din ban jaaye. To ye hain kuch aise upaay jinko karne se aap ban jaaoge is duniya ke sabse achhe bachhe ban jaaoge…

Mother's day ke din apni Mummy ko duniya ki sabse achhi Mummy saabit karne ke 9 tarike!!

1. Subah uthte hi Mummy ke pair chhu lo, aur unke liye chai-coffee unke bister mein lekar jaao, apne haathon se banakar.

2. Apni Mummy ki doston ko apne ghar par bula lo,(bina Mummy ko bataye) aur Mummy ki taraf se unhe ek zordar party de daalo.

3. Mummy aur Papa ke liye kisi hotel mein shaam ke khaane ka prabandh karo. (Yaad rahe Mummy Papa ke alawa aur koi nahi jaayega, tum bhi nahi)

4. Mummy ko apni kamai se ya apni pocket money se ek aisa uphaar do jise wo hamesha apne paas rakh sakein.

5. Apne facebook account mein apni Mummy ke naam se ek pyara sa status post karo.

6. Ghar ka saara kaam tum karo, chahe wo jhaadu lagana ho ya khana pakana. Aaj ke din Mummy se zara sa bhi kaam karvaya to seedha narak mein jaaoge.

7. Girlfriend ya Boyfriend ka muh tak mat dekhna aaj, aur uska phone to uthane ki bhool bhi mat karna. Yaad rakho Mother’s day yaani sirf Maa ka din.

8. Mummy Papa ke shadi ki tasveer ko kisi naye andaaz mein frame karvakar chupchap unke kamre mein laga do.

9. Raat ko sote samay apni Mummy se kaho ki wo is duniya ki sabse achhi Mummy hain. Aur unhe jaake apne gale se laga lo.

To bhaktjano ye the kuch aise upaay jinko aapne prayog kiya to samjho aapki Maata ka dil aapne hamesha-hamesha ke liye jeet liya. Aur haan sabhi Maataon ko Dhongi Baba ka Pranaam.

Girlfriend Ki Friend Ko Patane Ke 8 Tarike

Kai bhakton ka kehna hai ki unki girlfriend se zyaada girlfriend ki friend khoobsoorat hai, ab unhe kuch aise upay chahiye ki unki girlfriend ki friend bhi unke pyaar mein paagal ho jaaye. To hum laaye hain 8 tarike aapki girlfriend ki friend ko patane ke:-

1. Premika ki friend ke janmdin par use koi mehenga sa gift do. Yaad rahe achha nahi ho chalega, par mehenga hona chahiye.

2. Use batao ki tumhari premika tum par kitne julm dhaati hai.

3. Use kaho ki wo ladka bada hi kismat waala hoga jisse use pyar hoga, fir dekho kamaal.

4. Use apni baaton se deewana bana do, par ye jatao nahi ki tum use pasand karte ho.

5. Apni premika ke saath uske ghar jaao, uske maata pita se mel jol badhao, bhavishya mein kaam aayega.

6. Jald se jald apni premika se peechha chhudva lo. Aaj hi apni prem kahani ka ant karo.

7. Apni premika aur uski best friend ke beech mein aag laga do.

8. Apni premika se uski dost ke raaz ugalva lo aur fir us raaz ka bharpoor faayda uthao.

Kal hamne ‘Pan Singh Tomar’ Film Dekhi. Kya kehne is film ke. Laajawab kahani, aur zabardast acting. Irfan ne jo abhinay kiya hai ‘Pan Singh’ ka, use dekhkar to hamara dil kar raha hai ki is film ko aur dekha jaaye. Pahadon ke beechon beech apni toli mein jab ‘Pan Singh’ ko dikhaya gaya to hame bhi ichha hui ki hum bhi koi aisa hi gang banayein.

Film ke 2 dialog ne hamara dil jeet liye:-
1- Beehad mein ‘BAAGHI’ hote hain, ‘DACAIT’ milte hain parliament mein! (Jab Irfan bete ne ye dialog bola to hum to maare khushi ke lot-pot ho gaye.)

2-Kaho Haan! (Arre hum aapko haan kehne ke liye nahi keh rahe hain, Is film mein Irfan kehte hain, Kaho haan, aur jis ada se kehte hain, usne hume unka prasansak bana diya.)

Baadha daud mein 7 baar Rashtriya Champion reh chuke, ek fauji retire ‘Pan Singh’ ko jab gundo se bachne ke liye police ki madad chahiye hoti hai to bhi unhe police ki koi madad nahi milti. Aur unke parivar ko baar baar gundagardi ke dukh dard sehne padte hain. Baad mein fauj se retire ho chuke ‘Pan Singh’ apna gang banate hain, aur apne dushmano se badla lete hain.

Hamari aakhon ke saamne to ab bhi pan singh hi dikh rahe hain, aap bhi dekhna na bhuliye, Paan Singh Ki kahani hindi cinema ki zubani…Hum chale fir se dekhne ‘PAN SINGH TOMAR’ !!! To koi bhi poochhe dekhi “Paan Singh Tomar” to KAHO HAAN

Holi Ke Bahane Ladki Patane Ke Rangeen Tarike

Holi hai rango ka tyohar, holi ke is khas mauke ko yun hi na gavaiye. Kisi se apni mohobbat ka izhaar karne ka isse achha mauka bhala aur kya ho sakta hai…To apnaiye ye 5 rangeele upaay, aur rangon ke is tyohar ko hamesha ke liye yaadgar bana lijiye…

1. Use sirf hara rang hi lagao, hara rang sachhe pyar ki nishani hai.

2. Use jab rang lagao to uske saare chehre ko aise ghiso jaise usne kai saalon se nahi nahaya ho, use mehsoos hona chahiye ki tum kya batana chaah rahe ho.

3. Pehle use Chips, Gujhia, Bhang ke Pakore Dahi Bhalle ityaadi khilao, baad mein aisa rango jaisa aaj tak kisi ne na ranga ho. Khali pet rangoge to ishq ka asar kam hoga.

4. Use apni god mein uthakar paani ke toube mein phenk do. Aur jab phenko to use bhi lagna chahiye ki tumhare baajuon mein kitna dum hai.

5. Gaay ke gobar se holi khelo, hum vachan dete hain, uske baad wo tumhare saath jo karegi, tum use zindagi bhar nahi bhool sakoge.

Chunaav Maidan Mein Dhongibaba

Hame aisa lagta hai ki hamare desh ki rajneeti ko hamari bahut zaroorat hai. Isiliye ab humne faisla kiya hai ki hum bhi agli baar chunaav ladenge.
Jeetna to hamara nischit hi hai, jeetne ke baad hum jo kaam karenge wo kuch is tarah hain:-

1. Har majnu ko uski laila se pyar ka izhar karne ka ek sunehra avsar diya jaayega.

2. Sabse pehle petrol ki keemat ko kam kiya jayega, petrol sasta hoga tabhi to dvi chakra vaahan, arthaat Bike mein ghoomkar ishq lada sakoge.

3.Koi bhi kabhi fail nahi hoga. Har vishay mein 10 ank dhongi sarkaar ki taraf se diye jaayenge. Fir bhi yadi koi fail hua to agle hi din uski shadi kara dee jaayegi.

4. Jab jab cricket match hoga, tab tab school ya daftar sabka rashtriye avkas ghoshit kiya jayega.

5. Jo bhi 5 se zyaada ladke ladkiyan patayega use sarkari naukari dee jaayegi.

6. Ek saath 4-5 love affair rakhne waale ko hamara P.A. banaya jaayega, Kyunki jo 4-5 logon se ek saath prem karta hua nahi pakda gaya, wo aaram se 2-4 hazaar ke ghotale to kar hi lega.

Pyar mein aksar logon ke dil toot jaate hain, kyunki wo apne pyar ka izhaar sahi tarike se nahi kar paate. Ab aapko hum de rahe hain 5 aise upay jinhe aap apne pasandeeda vyakti par apnayeimnge to pyaar ki naiya ko paar kar jaayenge.

1. Hamesha akele mein propose karein, haan bolne ki sambhavna 50% bad jaati hai, aur agar naa bol diya to beizzati kam lagti hai.

2. Kisi hindi film ke hero ki tarah apne ghutno par baithkar apne pyar ka izhaar karo. Yadi use hindi filmein pasand hongi to tumhara kaam ban sakta hai.

3. Pehle usse dosti badhao. Fir dosti ka fayda uthakar use apne dil ka haal jata do. Yadi dosti pakki hogi to prem kahani mein koi baadha na aayegi.

4. Use samandar ki sair karane le jaao. Aur beech samandar mein usse kaho ki tum use kitna chahte ho, Yadi usne haan kaha to theek, warna use wahin samandar mein chhodkar waapas chale aao.

5. Jise tum prem karte ho use apne prem ka izhaar karo aur uski best friend ko ek laal gulaab ka phool uphaar mein de do. Dono to ye tension hoga ki kahin tum kisi aur ko apna dil na de do, aur isi baat ka faayda tumko milna nischit hai.

Kya Se Kya Ho Gaya. Kahan number1 the hum aur aaj dekho kahan pahucha diya ‘D’ compony ne hame. Ab Hum le aaye hain aise tarike ki ab Australiya mein bhi hamare dhurandar hamesha jeetkar aayenge:-

Australia Ko Dhool Chatane Ke 10 Desi Tarike

Kam Paison Mein Girlfriend Ko Jhelne Ke Tarike

Mehangai kaafi bad gayi hai bachha, aur aisi kamar tod mehangai mein yadi aapne koi premika banadaali to samjho aapka to kaam tamaam ho gaya. Kintu pyar to pyar hai, aur jeevan mein pyar nahi kiya to kya khaak jiye. To hum apne bhakton ke khoon-pasine ki kamai ko bachane ke liye laaye hain kuch aise tarike ki ab aapki jeb bhi dheeli na hogi aur aap jee bharke raas leela bhi kar sakenge.

1. Hamesha Akele Hi Milo:- Jee haan bhakton, jab bhi apni premika ke saath ishq ladane jaao to hamesha use akele mein hi mila karo. Yadi wo apne saath apne jaisi 2-4 aur kanyaon ko le aayi to tumhari jeb to kati samjho. Ye ladkiyan ek baar khane baith gayi to inki gaadi kabhi bhi nahi rukti bhakton.

2. Hamesha Jaldi Mein Raho:- Jab bhi usse milne ko jaao to hamesha jaldi jaane ka bahana banaya karo, tum jitni jaldi khiskoge, jeb par utna kam wazan padega.

3. Paisa Bhoolne Ka Bahana Banao:- Pehle use milne ko bula lo, phir aadhe raaste se phone karke kaho ki arre mein to apna purse ghar pe hi bhool aaya hun. Wo itna makeup karke aayi hogi ki uski bandariya jaisi shakal kisi hoor ki pari jaisi lagne lagegi. Aur wo ye kabhi bhi bahi chahegi ki uska itna makkeup bina tumse mile vyarth ho jaaye. Aur us din ki party ka kharcha wo swayam karegi….is tarah se saap bhi mar jaayega aur tumhari laathi bhi na tootegi bachha.

4. Soonsaan Jageh Par Milo:- Hamesha koshish karo ki usse kisi soonsaan jagah par hi mila jaaye. Aisi jagah jahan na koi dukan ho na koi hotel. Dhongibaba 100 taka guarenty dete hain bachha, ek paisa bhi kharcha na hoga, aur prem leela bhi khoob rachegi.

5. Use Hamesha Upwas ke Hi Din Milo:- Jee haan bhakton, ye chaal agar tum chal gaye to tumhe tumhare man ki karne se koi nahi rok sakta. Upwas ke din to wo kuch khayegi-piyegi nahi, aur kuch khayegi nahi piyegi nahi to tumhari jeb kya khaak dheeli hogi?

6. Muh Mein Takleef Hai Kaho:- Jab bhi usse milne jaao aur hotel mein baitho to use yahi kaho:- “ui maa, yaar aaj mere muh mein bada dard ho raha hai, mein kuch nahi khaunga piyunga” yadi wo tumhe sachha prem karti hogi to yakeen maano wo bhi kuch na khayegi, aur yadi wo bhukkad khane peene mein aa gayi to samajh lena ki use tumse koi pyaar-vyaar nahi hai. Phir to koi doosari ho dhoondane mein faayda hai.

7. Subah Ke Samay Kabhi Na Milo:- Kisi bhi haal mein use subah ke samay mat milo. Kyunki us waqt ladkiyan khoob khati hain. Zara socho ki wo agar khane baith gayi to subah, dopahar , shaam aur raat…Sabka ek hi time mein kha jaayegi. Aur phir jo bil aayega use dekhkar aapko aapki naani yaad aa jaayegi.

8- Pyar Pakka, Lekin Kharcha Aadha Aadha:- Bachha ye baat apne dimag mein utar lo. Pyar apni jagah theek hai, kintu jab baat ho kharcha karne ki to usmein dono ka 50% hissa hona chahiye. Ye baat aap use uske kaan mein daal do.

Hame aasha hai hamare bhakton ko in upayon ka laabh avashya milega. Aur haan abse jitni bachat hogi uska aadha hissa hame chada dena. Mehengai ne hame bhi bada pareshan kar diya hai, to hum chalte hain, aap sabhi bhaktjano ko Dhongibaba ka Dhong bhara aashirwad!!

Sada Khush Raho!